Matz-Erreka kooperatibaren 50 urteko ibilbidea batu dute liburu batean

Lau negozio-ildo ditu gaur egun enpresak eta horietako bakoitzaren historia biltzen da liburuan. Bakoitzak 100.000 pezeta jarrita, Luzio Agirrezabal, Julian Alberdi, Asensio Azkarate eta Inaxio Aristik sortu zuten Matz-Erreka kooperatiba 1961ean, Bergarako Masterreka kaleko 20. zenbakian, Inazio Basterrak bere etxearen beheko solairuan utzi zien lokalean. Torlojuak eta automobilerako osagarriak egiten hasi ziren.
Card image cap
Liburuaren aurkezpena, Antzuolako Torresoroa aretoan.
2011/09/07

Enpresaren jarduera eta langile kopurua haziz joan zen etengabe; 1962an Bergarako Azkarruntz auzoko lokal batera aldatu ziren, eta 1967an Bergaratik Antzuolara etorri ziren, 57 langilerekin.

1969an Euskadiko Kutxan bazkidetzeko kontratua izenpetu zuten eta hori oso garrantzitsua izan zen kooperatibaren ibilbidean, une hartan sartu baitzen Arrasaten osatzen ari zen Mondragon enpresa taldean.

Kontu horiek, negozio desberdinen sorrera eta bilakaera eta beste jasotzen ditu hainbat argazkiz lagunduta atera duten liburuak.

Pertsonen garrantzia

Gaur egun lau negozio-ildo ditu Matz-Errekak: ateetarako automatismoak, ate automatikoak, prezisiozko plastikoak eta finkapen elementuak. Azken negozio horretan 2000ko hamarkadan pauso inportanteak eman direla  adierazi zuen liburuaren aurkezpenean Mila Retolatza finkapeneko zuzendari komertzialak, "sortu duten lantalde indartsutik hasita".

Etorkizuna oparoa izan dadin Matz-Erreka "ondo kokatuta" dagoela adierazi zuen Jose Manuel Etxezarreta gerenteak. Guztiaren gainetik pertsonen garrantzia nabarmentzen da 50. urteurreneko liburuan eta horixe nabarmendu zuen aurkezpenean gerenteak ere. Datozen urteetan Matz-Errekak "orain arteko merkatuetan" jarraituko duela esan zuen Etxezarretak, agian berriak ere agertuko direla, mundu osoan saldu beharko dituztela euren produktuak eta ekoiztu ere, bai hemen baina baita kanpoan ere.

Elkarlanean

Elkarlanean osatu dute 50. urteurreneko liburua. Sekzio bakoitzeko arduradunek idatzi dituzte bakoitzari dagozkien atalak eta Idazti enpresak egin du edukien koordinazio lana. Aurkezpena martitzenean egin zuten Antzuolan; 40 bat lagun bildu ziren bertan.

Fastening Solutions, Plastics eta Sarbide Automatikoak